ന്യൂഡല്‍ഹി: കോവിഡ് വൈറസിനുള്ള ആയുര്‍വേദ മരുന്ന് വികസിപ്പിച്ചതായി അവകാശപ്പെട്ടു പത്ര സമ്മേളനം നടത്തി മണിക്കൂറുകൾക്കകം പതഞ്ജലി ഗ്രൂപ്പിനോട് കേന്ദ്രസർക്കാർ വിശദീകരണം തേടി. സര്‍ക്കാര്‍ പരിശോധിക്കുന്നത് വരെ കൊറോണില്‍ എന്ന് പേരിട്ടിരിക്കുന്ന പരസ്യം നിർത്തിവയ്ക്കാൻ കേന്ദ്ര ആയുഷ് മന്ത്രാലയം ഉത്തരവിട്ടു.
ഏഴു ദിവസം കൊണ്ട് കോവിഡ് രോഗം ഭേദപ്പെടുത്തുമെന്ന അവകാശവാദവുമായാണ് പതഞ്ജലി സ്ഥാപകനും യോഗ-ആയുര്‍വേദ വ്യവസായിയുമായ ബാബ രാംദേവ് കൊറോണിൽ സ്വാസാരി എന്ന മരുന്ന് ഇന്ന് പ്രഖ്യാപിച്ചത്. രോഗികളിൽ മരുന്നിന്‍റെ പരീക്ഷണം 100 ശതമാനം വിജയമായിരുന്നെന്നും പതഞ്ജലി അവകാശപ്പെടുന്നു.
