സൗദിയിൽ മൂന്ന് മലയാളികൾകൂടി കോവിഡ് ബാധിച്ച് മരിച്ചു. കൊല്ലം ചാത്തന്നൂര്‍ സ്വദേശി തോമസ് ജോൺ (54), തൃശൂര്‍ വടക്കേക്കാട് സ്വദേശി പ്രേമരാജൻ(65 ), മലപ്പുറം കോട്ടപ്പടി സ്വദേശി നജീബ് മച്ചിങ്ങൽ (50) എന്നിവരാണ് മരിച്ചത്.
തോമസ് ജോൺ ജിദ്ദയിലാണ് മരണപ്പെട്ടത്. കോവിഡ് ബാധിച്ച് മൂന്ന് ആഴ്ചയായി ജിദ്ദ സുലൈമാന്‍ ഫഖീഹ് ആശുപത്രിയില്‍ ചികിത്സയിലായിരുന്നു. പ്രേമരാജന്‍ ജുബൈലിലാണ് മരിച്ചത്. പനിയെത്തുടർന്ന് ഒരാഴ്ച മുൻപാണ് ആശുപത്രിയിൽ പ്രവേശിപ്പിച്ചത്. റിയാദിലാണ് നജീബ് മരണപ്പെട്ടത്. നാല് ദിവസം മുൻപാണ് റിയാദിലെ ആശുപത്രിയിൽ ഇദ്ദേഹത്തെ പ്രവേശിപ്പിച്ചത്. ഇന്ന് പുലർച്ചെ മരിച്ചു.
ഇതോടെ സൗദിയിൽ മരിച്ച മലയാളികളുടെ എണ്ണം 123 ആയി. ഗൾഫ് രാജ്യങ്ങളിൽ 306 മലയാളികളാണ് ഇതുവരെ കോവിഡ് ബാധിച്ച് മരിച്ചത്.
