ന്യൂഡല്ഹി : വ്യോമസേനയുടെ കരുത്ത് ഇരട്ടിയാക്കാന് ഫ്രാന്സില് നിന്നും ഇന്ത്യ വാങ്ങിയ റഫേല് വിമാനങ്ങളുടെ ആദ്യ ബാച്ച് യുഎഇയില് എത്തി. രാവിലെ പുറപ്പെട്ട വിമാനങ്ങള് ഇന്ന് വൈകീട്ടോടെ യുഎഇയിലെ എയര് ബേസില് സുരക്ഷിതമായി എത്തിയതായി ബന്ധപ്പെട്ട വൃത്തങ്ങള് അറിയിച്ചു. വിമാനങ്ങള് ബുധനാഴ്ചയോടെ ഇന്ത്യയില് എത്തും.
യുഎഇയിലെ ദഫ്ര എയര്ബേസിലാണ് അഞ്ച് വിമാനങ്ങളും പറന്നിറങ്ങിയിരിക്കുന്നത്. ഇന്ത്യയില് എത്താന് ഇനി ഏഴായിരം കിലോ മീറ്റര് സഞ്ചരിക്കേണ്ടതുണ്ടെന്നാണ് റിപ്പോര്ട്ടുകള്. ബുധനാഴ്ചയോടെ ഹരിയാനയിലെ അംബാലയിലെത്തുന്നതോടെ റഫേല് വിമാനങ്ങള് ഇന്ത്യയ്ക്ക് സ്വന്തമാകും.
ആദ്യഘട്ടത്തില് ഫ്രാന്സില് നിന്നെത്തുന്ന റഫേല് വിമാനങ്ങളെല്ലാം ലഡാക്കിലെ വ്യോമസേന താവളത്തിലേയ്ക്കാണ് എത്തിക്കുക. ലഡാക്കിലെ 3488 കിലോമീറ്റര് അതിര്ത്തിയിലെ എല്ലാ സജ്ജീകരണങ്ങളും പൂര്ത്തിയാക്കിയതായി വ്യോമസേനാ മേധാവികള് അറിയിച്ചു. നിലവില് മിഗ്, മിറാഷ്, സുഖോയ് വിമാനങ്ങളും ഹെലികോപ്റ്ററുകളും എത്തിച്ചുകഴിഞ്ഞു.