മാവേലിക്കര: കെഎസ്എഫ്ഇ കണ്ടിയൂർ ശാഖയുടെ വാതിലിന്‍റെ പൂട്ട് തകർത്ത് അകത്ത് കയറിയയാൾ മോഷണശ്രമത്തിനിടെ പോലീസിന്റെ പിടിയിലായി. ചെട്ടികുളങ്ങര ഈരേഴ വടക്ക് ആതിരഭവനത്തിൽ ഓമനക്കുട്ടനാ(52)ണ് അറസ്റ്റിലായത്. ഇയാൾ സിപിഎം ഈരേഴ വടക്ക് മുൻ ബ്രാഞ്ച് സെക്രട്ടറിയാണ്.
ശാഖയുടെ മുൻവശത്തെ ഷട്ടറിന്‍റെയും ഗ്രില്ലിന്‍റെയും ഗ്ലാസ് വാതിലിന്‍റെയും പൂട്ട് തകർത്താണ് അകത്ത് കടന്നത്. ഷട്ടർ ഉയർത്തുന്ന ശബ്ദം കേട്ട് സ്ഥാപനം പ്രവർത്തിക്കുന്ന കെട്ടിടത്തിന്‍റെ ഉടമ വാർഡ് കൗണ്‍സിലറെ വിവരമറിയിച്ചു. ഇദ്ദേഹം വിളിച്ചറിയിച്ച പ്രകാരം പോലീസ് സംഘം സ്ഥലത്തെത്തി. പോലീസ് അകത്ത് കടന്നപ്പോൾ ഓമനക്കുട്ടൻ മേശയുടെ അടിയിലായി ഒളിച്ചിരിക്കുകയായിരുന്നു.
