തിരുവനന്തപുരം: തദ്ദേശ തെരഞ്ഞെടുപ്പില്‍ കോവിഡ് ബാധിതര്‍ക്കും ക്വാറന്‍റൈനിലുള്ളവർക്കും വോട്ട് ചെയ്യാൻ അവസരം. ഇവർക്ക് തപാൽ വോട്ട് ചെയ്യാനുള്ള സൗകര്യമാണ് ഒരുക്കുന്നത്.
എന്നാൽ ഇതിനായി മൂന്ന് ദിവസം മുന്‍പ് അപേക്ഷ നല്‍കണമെന്ന് മുഖ്യതെരഞ്ഞെടുപ്പ് കമ്മീഷണര്‍ വി.ഭാസ്‌കരന്‍ വാര്‍ത്താ സമ്മേളനത്തില്‍ അറിയിച്ചു.
കോവിഡ് പോസിറ്റീവായവര്‍ കോവിഡ് പോസിറ്റീവ് സര്‍ട്ടിഫിക്കറ്റ് സഹിതം റിട്ടേണിംഗ് ഓഫീസറിന് അപേക്ഷ നല്‍കണം. വോട്ട് രേഖപ്പെടുത്തി ഡിക്ലറേഷന്‍ സഹിതം തിരിച്ചയക്കാം.
വോട്ടെണ്ണല്‍ ദിവസം രാവിലെ വരെ ലഭിക്കുന്ന തപാല്‍ വോട്ടുകള്‍ എണ്ണുമെന്നും തെരഞ്ഞെടുപ്പ് കമ്മിഷന്‍ വ്യക്തമാക്കി. ക്വാറന്‍റീനിലുള്ളവർ പിപിഇ കിറ്റ് ധരിച്ചെത്തി വോട്ട് ചെയ്യുന്ന കാര്യവും പരിഗണനയിലാണെന്നും കമ്മീഷൻ അറിയിച്ചു.
കോവിഡ് പ്രോട്ടോകോള് കര്‍ശനമായി പാലിച്ചായിരിക്കും തെരഞ്ഞെടുപ്പ് നടത്തുക. മാസ്‌ക്, ഗ്ലൗസ്, സാനിറ്റൈസര്‍ ശാരീരിക അകലം എന്നിവ നിര്‍ബന്ധമാണ്.
