കളമശ്ശേരി:പണം ലഭിക്കാത്തതിനെ തുടർന്ന് എടിഎമ്മിന് തീയിട്ട യുവാവ് പിടിയിൽ . പനച്ചിപ്പാറ കല്ലാടിയിൽ സുബിൻ സുകുമാരനാണ് (31) പിടിയിലായത്. കവിളിലും, മൂക്കിലും കൈയ്ക്കും പൊള്ളലേറ്റ ഇയാളെ എറണാകുളത്തുനിന്ന് പിടികൂടുകയായിരുന്നു.
ഞായറാഴ്ച്ച വൈകിട്ട് കൊച്ചിൻ യൂണിവേഴ്സിറ്റി ക്യാമ്പസിനുള്ളിലെ എടിഎമ്മിനാണ് സുബിൻ പെട്രോൾ ഒഴിച്ച് തീയിട്ടത്. രാത്രി എട്ടരയോടെ കൗണ്ടറിനകത്തുനിന്ന് പുക ഉയരുന്നത് ക്യാമ്പസിലെ സെക്യൂരിറ്റി വിഭാഗത്തിന്റെ ശ്രദ്ധയിൽപ്പെടുമ്പോഴാണ് അറിയുന്നത്. ഉടൻ ജീവനക്കാരും ബാങ്ക് അധികൃതരും ചേർന്ന് തീയണക്കുകയായിരുന്നു.
എസ്ബിഐയുടെ എടിഎമ്മിൽ നിന്നും പണം പിൻവലിക്കാൻ സാധിക്കാതെ വന്നതിനെ തുടർന്നാണ് തീയിട്ടതെന്നാണ് സംശയം.കുപ്പിയിൽ പെട്രോളുമായാണ് യുവാവ് എടിഎം കൗണ്ടറിൽ എത്തിയത്. പിന്നീട് കാർഡ് എടുത്ത് മെഷീനിൽ ഇട്ടു. പണം കിട്ടാതെ വന്നതിനെ തുടർന്ന് എടിഎം മെഷീനിൽ കയ്യിൽ കരുതിയ പെട്രോൾ ഒഴിക്കുകയായിരുന്നു. തീ വേഗത്തിൽ പടർന്നു പിടിക്കുകയും ചെയ്തു .