.
കൊല്ലം: ലോറി ഡ്രൈവറെ കുത്തേറ്റ് മരിച്ചനിലയിൽ കാണപ്പെട്ടു. കുണ്ടറ കേരളപുരം സ്വദേശി അജയൻപിള്ള (56) ആണ് മരിച്ചത്.
വ്യാഴാഴ്ച പുലർച്ചെ ആയൂരിൽ പാതയോരത്ത് നിർത്തിയിട്ടിരുന്ന ലോറിയുടെ ക്യാബിന് സമീപമാണ് മൃതദേഹം കാണപ്പെട്ടത്. ശരീരത്തിൽ ഒട്ടേറെ കുത്തേറ്റിട്ടുണ്ട്. ചോരവാർന്നനിലയിലാണ് മൃതദേഹം കണ്ടെത്തിയത്. ലോറിയുടെ ക്യാബിന് സമീപവും ചോര തളംകെട്ടികിടക്കുന്നു. പരിസരവാസികൾ വിവരമറിയിച്ചതിനെതുടർന്ന് ചടയമംഗലം പോലീസെത്തി മൃതദേഹം ആശുപത്രിയിലേക്ക് മാറ്റി.
മോഷ്ടാക്കൾ ലോറി ഡ്രൈവറെ അപായപ്പെടുത്തി പണം തട്ടാൻ ശ്രമിച്ചതാണോ എന്ന് പോലീസ് അന്വേഷിക്കുന്നു. സിസിടിവി ദൃശ്യങ്ങൾ പരിശോധിച്ചുവരികയാണെന്ന് ചടയമംഗലം പോലീസ് പറഞ്ഞു.