ന്യൂഡല്ഹി: പ്രധാനമന്ത്രി നരേന്ദ്രമോദിയുടെ ജന്മദിനത്തില് പ്രത്യേക മെഗാ വാക്സിനേഷൻ നടത്താനൊരുങ്ങി ബിജെപി. സെപ്റ്റംബര് 17ന് ഇതുവരെയുള്ള റിക്കാര്ഡുകൾ മറികടക്കുന്ന രീതിയിൽ വാക്സിനേഷന് നല്കാനാണ് പാര്ട്ടിയുടെ തീരുമാനം.
പാര്ട്ടിയുടെ ബൂത്തു തലം മുതല്ലുള്ള പ്രവര്ത്തകര് ജനങ്ങള്ക്ക് വാക്സിന് നല്കാന് സഹായവും രംഗത്തിറങ്ങുമെന്ന് പാര്ട്ടി ദേശീയ അധ്യക്ഷന് ജെ.പി നഡ്ഡ പറഞ്ഞു. രാജ്യത്തെ ആരോഗ്യസംവിധാനം ശക്തിപ്പെടുത്താന് രണ്ട് ലക്ഷം ഗ്രാമങ്ങളിലായി നാല് ലക്ഷം വോളണ്ടിയര്മാരെ പരിശീലിപ്പിക്കും. 43 ദിവസത്തിനുള്ളില് 6.88 ലക്ഷം വോളണ്ടിയര്മാര്ക്ക് പരിശീലനം നല്കിയതായും ഉടന് തന്നെ അത് എട്ട് ലക്ഷമായി ഉയരുമെന്നും അദ്ദേഹം പറഞ്ഞു.
മുമ്പ് ബിജെപി മോദിയുടെ ജന്മദിനം “സേവാ സപ്ത’ എന്ന് ആഘോഷിച്ചിരുന്നു. ജന്മദിനാഘോഷത്തിന്റെ ഭാഗമായി പ്രധാനമന്ത്രിയുടെ ജീവിതത്തെയും പ്രവര്ത്തനത്തെയും കുറിച്ച് ജില്ലാ സംസ്ഥാന തലങ്ങളില് വിവിധ മേഖലകളിലെ പ്രമുഖര് പങ്കെടുക്കുന്ന പരിപാടികളും നടക്കും.