കൊച്ചി:ഡോ. സിറിയക് അബി ഡോ സിറിയക് അബി ഫിലിപ്സിന് അന്താരാഷ്ട്ര പുരസ്കാരം അമേരിക്കൻ അസോസിയേഷൻ ഫോർ ദി സ്റ്റഡി ഓഫ് ലിവർ ഡിസീസസിന്റെ (AASLD) ഫൌണ്ടേഷൻ ഫെല്ലോ പുരസ്കാരം. കരൾ രോഗം പ്രതിരോധിക്കുന്നതിനും ഭേദമാക്കുന്നതിനും പ്രതിജ്ഞാബദ്ധരായ ശാസ്ത്രജ്ഞരും ആരോഗ്യ പരിപാലന വിദഗ്ധരും ഉൾപ്പെടുന്ന പ്രമുഖ അന്താരാഷ്ട്ര സംഘടനയാണ് AASLD. ഡോ. സിറിയക് അബി ഫിലിപ്സിന്റെ ക്ലിനിക്കൽ ഗവേഷണ പ്രവർത്തനങ്ങളെ മുൻനിർത്തിയാണ് അവാർഡ്. 2022 മെയ് 21-24 തീയതികളിൽ യുഎസ്എയിലെ കാലിഫോർണിയയിലെ സാൻ ഡിയാഗോയിൽ നടക്കുന്ന ഡൈജസ്റ്റീവ് ഡിസീസ് വീക്കിൽ (DDW) പഠനം അവതരിപ്പിക്കും. ഈ അഭിമാനകരമായ അവാർഡ് ലഭിക്കുന്ന ആദ്യ കേരളീയനും ഇന്ത്യക്കാരനുമാണ് അദ്ദേഹം. ഗ്യാസ്ട്രോഎൻട്രോളജി, ഹെപ്പറ്റോളജി, എൻഡോസ്കോപ്പി, ഗ്യാസ്ട്രോഇന്റസ്റ്റൈനൽ സർജറി എന്നീ മേഖലകളിലെ ഫിസിഷ്യൻമാർ, ഗവേഷകർ, വ്യവസായികൾ എന്നിവർക്കായുള്ള ലോകത്തിലെ പ്രധാന മീറ്റിംഗാണ് DDW. ഇവിടെ ഡോ. സിറിയക് അബി ഫിലിപ്സ് തന്റെ പഠനം അവതരിപ്പിക്കും, മദ്യവുമായി ബന്ധപ്പെട്ട ഗുരുതരമായ കരൾ രോഗമുള്ള രോഗികളിൽ ഉയർന്ന ഡോസ് പ്രോബയോട്ടിക് (വാണിജ്യപരമായി ലഭ്യമായ നല്ല ബാക്ടീരിയ) തെറാപ്പിയുടെ ഉപയോഗവുമായി ബന്ധപ്പെട്ട പുതിയ കണ്ടെത്തലുകൾ നടത്തിയതിനാണ് അവാർഡ്.
ഡോ. സിറിയക് എബി ഫിലിപ്സ്, രാജഗിരി ആശുപത്രിയിലെ സെന്റർ ഓഫ് എക്സലൻസിന്റെ കീഴിലുള്ള ലിവർ ഇൻസ്റ്റിറ്റ്യൂട്ടിലെ ക്ലിനിക്കൽ-സയന്റിസ്റ്റും സീനിയർ കൺസൾട്ടന്റുമാണ്. ദേശീയ അന്തർദേശീയ പ്ലാറ്റ്ഫോമുകളിൽ പ്രത്യേക ശ്രദ്ധ നേടിയ 165-ലധികം ശാസ്ത്ര ഗവേഷണ പഠനങ്ങൾ ഡോ. സിറിയക് അബി ഫിലിപ്സ് പ്രസിദ്ധീകരിച്ചിട്ടുണ്ട്. കേരള സർക്കാരിന്റെ ആരോഗ്യ-കുടുംബക്ഷേമ മന്ത്രാലയത്തിന് കീഴിലുള്ള കേരള ഡവലപ്മെന്റ് ആൻഡ് ഇന്നവേഷൻ സ്ട്രാറ്റജിക് കൗൺസിൽ, സെന്റർ ഓഫ് എക്സലൻസ് മൈക്രോബയോം സ്റ്റഡീസ് എന്നിവിടങ്ങളിലെ വിദഗ്ദ്ധാംഗം കൂടിയാണ് അദ്ദേഹം. കരൾ രോഗങ്ങളുള്ള രോഗികൾക്ക് പ്രയോജനം ചെയ്യുന്നതിനായി അടിസ്ഥാന ശാസ്ത്ര ഗവേഷണം നടത്തുന്ന രാജഗിരി ആശുപത്രിയിലെ മോണാർക്ക് ലിവർ ലബോറട്ടറിയുടെ ഡയറക്ടറായും പ്രവർത്തിക്കുന്നു.