കാഞ്ഞങ്ങാട്: പെരിയ ഇരട്ടക്കൊലപാതകം വ്യക്തികള് തമ്മിലുള്ള പ്രാദേശിക പ്രശ്നം എന്ന് സിപിഎം ആവര്ത്തിക്കുന്നതിനിടെ, പാര്ട്ടി ജില്ലാ നേതാക്കള്ക്കും എംഎല്എയ്ക്കുമെതിരെ കൂടുതല് വെളിപ്പെടുത്തലുകള്. ഉദുമ എംഎല്എ കെ. കുഞ്ഞിരാമന്, മുന് എംഎല്എയും സിപിഎം ജില്ലാ സെക്രട്ടേറിയറ്റ് അംഗവുമായ കെ.വി. കുഞ്ഞിരാമന്, ജില്ലാ സെക്രട്ടേറിയറ്റ് അംഗവും ജില്ലാ പഞ്ചായത്ത് അംഗവുമായ വി.പി.പി. മുസ്തഫ എന്നിവര്ക്കെതിരെയാണു വെളിപ്പെടുത്തലുകള്. ഗൂഢാലോചന നടന്നിട്ടുണ്ടെന്നും മുതിര്ന്ന നേതാക്കള്ക്ക് ഇതേക്കുറിച്ച് അറിയാമെന്നുമാണു കൊല്ലപ്പെട്ട കൃപേഷിന്റെയും ശരത്ലാലിന്റെയും ബന്ധുക്കള് ആരോപിക്കുന്നത്
കൊലപാതകം നടന്നതിന്റെ പിറ്റേന്ന്, രാത്രി 8.30നു ശേഷം വെളുത്തോളി പാക്കം ചെറോട്ടിയിലെ ഊടുവഴിയില് സജിയുടെ(സജി ജോര്ജ്ജ്) വാഹനം കണ്ടു. വാഹനം പൊലീസ് പരിശോധിക്കുന്നതിനിടെ സജി സ്ഥലത്തെത്തി. തുടര്ന്നു സജിയെ സ്റ്റേഷനിലേക്കു കൊണ്ടുപോകാന് ശ്രമിക്കുന്നതിനിടെ 2 പ്രാദേശിക നേതാക്കള്ക്കൊപ്പം കെ.വി. കുഞ്ഞിരാമന് സ്ഥലത്തെത്തി പൊലീസിനെ ഭീഷണിപ്പെടുത്തി ബലം പ്രയോഗിച്ചു കാറിന്റെ ഡോര് തുറന്നു സജിയെ പുറത്തിറക്കി ഇവരുടെ വാഹനത്തില് കയറ്റിക്കൊണ്ടുപോയി എന്നിങ്ങനെയാണ് സാക്ഷിമൊഴികള്.
പ്രദേശത്ത് നിരന്തരം സംഘര്ഷങ്ങളുണ്ടായപ്പോള് പ്രശ്നത്തില് ഇടപെടാന് കെ. കുഞ്ഞിരാമന് എംഎല്എയോട് ആവശ്യപ്പെട്ടെങ്കിലും പ്രശ്നം പരിഹരിക്കുന്നതിനു പകരം അക്രമത്തിന് ആഹ്വാനം ചെയ്തുവെന്നു കൊല്ലപ്പെട്ട ശരത്ലാലിന്റെ കുടുംബം ആരോപിച്ചു. എന്നാല് താന് തീവച്ചു നശിപ്പിക്കപ്പെട്ട ഓഫിസ് സന്ദര്ശിച്ചിരുന്നുവെന്നത് ശരിയാണെന്നും അക്രമത്തിന് ആഹ്വാനം ചെയ്തിട്ടില്ലെന്നുമാണ് കുഞ്ഞിരാമന് എം എല് എ പറയുന്നത്.
ഇതിനിടയില് പെരിയയില് യൂത്ത് കോണ്ഗ്രസ് പ്രവര്ത്തകര് കൊല്ലപ്പെടുന്നതിന് ഒരു മാസം മുന്പു സിപിഎം ജില്ലാ സെക്രട്ടേറിയറ്റ് അംഗം വി.പി.പി. മുസ്തഫ നടത്തിയ കൊലവിളി പ്രസംഗത്തിന്റെ വിഡിയോ പുറത്തായി. സിപിഎം ലോക്കല് കമ്മിറ്റി അംഗം എ.പീതാംബരനെയും പ്രവാസി സംഘം വില്ലേജ് സെക്രട്ടറി എ. സുരേന്ദ്രനെയും കോണ്ഗ്രസ് പ്രവര്ത്തകര് ആക്രമിച്ചതില് പ്രതിഷേധിച്ചു ജനുവരി 7നു കല്യോട്ട് നടത്തിയ യോഗത്തിലാണു വിവാദ പ്രസംഗം.
‘സഖാവ് പീതാംബരനെയും സുരേന്ദ്രനെയും മര്ദിക്കുന്നതുവരെയുള്ള സംഭവങ്ങള് ഞങ്ങള് ക്ഷമിക്കുകയാണെന്നും പെറുക്കിയെടുത്ത് ചിതയില് വയ്ക്കാന് ബാക്കിയില്ലാത്ത വിധത്തില്, ചിതറിപ്പോകുമെന്നും വീഡിയോവിലുണ്ട്.
മുസ്തഫ ഈപ്രസംഗം നിഷേധിച്ചിട്ടില്ല.
Home Local News Kasaragod പെരിയ ഇരട്ടക്കൊലപാതകം: സിപിഎം ജില്ലാ നേതാക്കള്ക്കും എംഎല്എയ്ക്കുമെതിരെ കൂടുതല് വെളിപ്പെടുത്തലുകള്