കോഴിക്കോട്: കോഴിക്കോട് കടപ്പുറത്ത് ബിജെപി ബിജെപി സംഘടിപ്പിച്ച വിജയ് സങ്കല്പ് റാലിയുടെ വേദിയില് പ്രധാനമന്ത്രി നരേന്ദ്രമോദിക്കും കേരളത്തിലെ പ്രധാന എന്ഡിഎ-ബിജെപി നേതാക്കള്ക്കും ഒപ്പം ജനപക്ഷം നേതാവ് പിസി ജോര്ജും.
പ്രധാനമന്ത്രി എത്തും മുന്പായി റാലിയില് പങ്കെടുത്തു സംസാരിച്ച പിസി ജോര്ജ് അതിരൂക്ഷ വിമര്ശനമാണ് എല്ഡിഎഫിനും യുഡിഎഫിനും നേര്ക്ക് ഉന്നയിച്ചത്. വരാനിരിക്കുന്ന തെരഞ്ഞെടുപ്പുകളിലെല്ലാം ബിജെപിയേയും എന്ഡിഎ മുന്നണിയേയും ജയിപ്പിക്കാന് വേണ്ടി പ്രവര്ത്തിക്കാന് പ്രവര്ത്തകരോട് ആഹ്വാനം ചെയ്തു.
നിയമസഭയില് ഇത്രയും കാലം എന്ഡിഎയെ പിന്തുണയ്ക്കാന് ഒ.രാജഗോപാല് മാത്രമേ ഉണ്ടായിരുന്നുള്ളൂ, എന്നാല് ഇനി കൂടെ താനുണ്ടാവുമെന്ന് ജോര്ജ് പറഞ്ഞു. ആളില്ലാത്ത പോസ്റ്റിലേക്ക് ഗോളടിക്കുന്ന പരിപാടിയാണ് ഇത്രയും കാലം നടന്നു കൊണ്ടിരുന്നത്. സിപിഎമ്മും കോണ്ഗ്രസും ലീഗും കൂടി ബിജെപിയെ വളഞ്ഞിട്ട് ആക്രമിക്കുകയായിരുന്നു. ഇനി അതു നടപ്പില്ല. രാജേട്ടനൊപ്പം എന്ഡിഎയെ പ്രതിരോധിക്കാന് താനും കൈകോര്ക്കുകയാണ്. ഇനി ഗോളടിക്കാന് വരുന്നവന്റെ ചങ്കിലെ മര്മ്മം നോക്കി തിരിച്ചടിക്കും. 44 സീറ്റുണ്ട് പാര്ലമെന്റില് കോണ്ഗ്രസിന്. ദയവ് ചെയ്ത് അയാള്ക്കൊരു പ്രതിപക്ഷനേതാവ് സ്ഥാനം കൊടുക്കണം. പ്രതിപക്ഷത്തിരുന്ന് അവര് കാര്യങ്ങള് പഠിക്കട്ടെ. അതേസമയം രാഹുല് ഗാന്ധിക്കും കോണ്ഗ്രസ് നേതാക്കള്ക്കും ബുദ്ധി വളരാന് വേണ്ടി നമ്മുക്ക് പ്രാര്ത്ഥിക്കാമെന്ന് ജോര്ജ് പരിഹസിച്ചു.
ശബരിമലയിലെ ആചാരങ്ങളെ തകര്ക്കാന് പതിനാറ് പിണറായി വിജയന് വിചാരിച്ചാലും നടക്കില്ല. ശബരിമല വിഷയത്തില് നിലപാട് വ്യക്തമാക്കിയില്ലെങ്കില് വോട്ടിന് പകരം ആട്ടാവും രാഹുലിന് വയനാട് കിട്ടുക. ബിജെപിയുടെ പ്രകടന പത്രികയില് ആചാരസംരക്ഷണം ഒരു ലക്ഷ്യമായി പ്രഖ്യാപിച്ചിട്ടുണ്ട്. നാണ്യവിളയായ റബ്ബറിനെ കാര്ഷിക വിളയായി പ്രഖ്യാപിച്ചത് മോദി സര്ക്കാരാണ്. അങ്ങനെയുള്ള സര്ക്കാരിനെ മധ്യകേരളത്തിലെ കര്ഷകര് എതിര്ത്താല് അത് നന്ദികേടാവുമെന്ന് ജോര്ജ് പറഞ്ഞു.