ന്യൂഡൽഹി: രാജ്യവും സർക്കാരും കർഷകരോട് കടപ്പെട്ടിരിക്കുന്നുവെന്ന് രാഷ്ട്രപതി രാംനാഥ് കോവിന്ദ്. റിപ്പബ്ലിക് ദിനത്തിനു മുന്നോടിയായി രാജ്യത്തെ അഭിസംബോധന ചെയ്ത് സംസാരിക്കവെയാണ് രാഷ്ട്രപതി കർഷകരുടെ സംഭാവന എടുത്തുപറഞ്ഞത്.
കോവിഡ് മഹാമാരിയുടെ കാലത്ത് കർഷകർ വലിയ പ്രതിസന്ധിയാണ് നേരിട്ടത്. എന്നാൽ എല്ലാ പ്രതിസന്ധികളെയും തരണം ചെയ്ത് കർഷകർ ഭക്ഷ്യ ഉത്പന്നങ്ങളുടെ ഉൽപ്പാദനത്തിൽ കുറവ് വരാതെ കാത്തുവെന്നും രാഷ്ട്രപതി പറഞ്ഞു.
കോവിഡ് പ്രതിരോധത്തിൽ ആരോഗ്യ പ്രവർത്തകർ വലിയ പങ്കാണ് വഹിച്ചതെന്നും രാഷ്ട്രപതി കൂട്ടിച്ചേർത്തു. കോവിഡ് വാക്സീന് പിന്നിൽ പ്രവർത്തിച്ച ശാസ്ത്രജ്ഞരെയും രാഷ്ട്രപതി അഭിനന്ദിച്ചു.