ന്യൂഡൽഹി: കേരളത്തിന് നൽകിയ പത്തു ലക്ഷം ഡോസ് കോവിഡ് വാക്സിൻ ഇതുവരെ ഉപയോഗിച്ചിട്ടില്ലെന്ന് കേന്ദ്ര ആരോഗ്യമന്ത്രി മൻസുഖ് മാൻഡവ്യ. ഈ പത്ത് ലക്ഷം ഡോസ് ഉപയോഗിച്ചതിന് ശേഷം ആവശ്യപ്പെടുന്ന മുറയ്ക്കു വീണ്ടും നൽകാൻ തയാറാണെന്നും മന്ത്രി വ്യകത്മാക്കി.
കേരളത്തിലെ വാക്സിൻ ക്ഷാമം പരിഹരിക്കണമെന്ന് ആവശ്യപ്പെട്ടു സമീപിച്ച എംപിമാരായ ടി.എൻ പ്രതാപൻ, ഹൈബി ഈഡൻ എന്നിവരോടാണ് മന്ത്രി ഇക്കാര്യം വ്യക്തമാക്കിയത്. വിവിധ സംസ്ഥാനങ്ങൾക്ക് കേന്ദ്രം നൽകിയ വാക്സിൻ ഡോസുകളുടെ കണക്കുകളും മന്ത്രി വിശദീകരിച്ചു.
കേരളത്തിൽ ആരോഗ്യ പരിരക്ഷാ സംവിധാനങ്ങൾ ഏറെ മെച്ചപ്പെട്ടതാണ്. എന്നിട്ടും രോഗവ്യാപനത്തിന് എന്തേ ശമനമില്ലാത്തത് എന്ന് മന്ത്രി ആശങ്കപ്പെട്ടു. കേരള സർക്കാരിന്‍റെ കോവിഡ് പ്രതിരോധം ദുർബലമാണെന്നതിന്‍റെ തെളിവല്ലേ ഇപ്പോഴുള്ള സ്ഥിതിയെന്നും മന്ത്രി ചോദിച്ചു.
