തിരുവനന്തപുരം: സ്ത്യുത്യര്ഹ സേവനത്തിനുളള രാഷ്ട്രപതിയുടെ പോലീസ് മെഡലിന് കേരളത്തില് നിന്ന് 10 പോലീസ് ഉദ്യോഗസ്ഥര് അര്ഹരായി. ഐ.ജി നാഗരാജു ചക്കിലം, എസ്പി ബി.കൃഷ്ണകുമാര്, എസ്പി ജയശങ്കര്.ആര്, ഡിവൈഎസ്പി കെ.എച്ച്. മുഹമ്മദ് കബീര് റാവുത്തര്, കെ.ആര്. വേണുഗോപാലന്, ഗോപാലകൃഷ്ണന്.എം.കെ, ഡെപ്യൂട്ടി കമാന്റന്റ് റ്റി.പി.ശ്യാംസുന്ദര്, സബ്ബ് ഇന്സ്പെക്ടര് സാജന്. കെ.ജോര്ജ്, അസിസ്റ്റന്റ് സബ് ഇന്സ്പെക്ടര്മാരായ ശശികുമാര്. എല്, ഷീബ.എ.കെ എന്നിവര്ക്കാണ് സ്തുത്യര്ഹസേവനത്തിനുളള രാഷ്ട്രപതിയുടെ പോലീസ് മെഡല് ലഭിച്ചത്.
ഐ.ജി നാഗരാജു ചക്കിലം നിലവില് കൊച്ചി സിറ്റി പോലീസ് കമ്മീഷണറാണ്. ബി.കൃഷ്ണകുമാര് നിലവില് ഇന്റേണല് സെക്യൂരിറ്റി എസ്.പി ആണ്. ഇടുക്കി അഡീഷണല് എസ്.പിയായ കെ.എച്ച്.മുഹമ്മദ് കബീര് റാവുത്തര് പാലക്കാട്, കോഴിക്കോട് സിറ്റി എന്നിവിടങ്ങളില് ജില്ലാ ക്രൈംബ്രാഞ്ച് ഡിവൈ.എസ്.പി ആയിരുന്നു.
കെ.ആര്.വേണുഗോപാലന് നിലവില് കൊച്ചിന് ഷിപ്പ് യാര്ഡില് ഡെപ്യൂട്ടേഷനില് വിജിലന്സ് ഓഫീസറായി ജോലിനോക്കുന്നു. കെ.എ.പി നാലാം ബറ്റാലിയനില് ഡെപ്യൂട്ടി കമാന്റന്റാണ് റ്റി.പി.ശ്യാം സുന്ദര്. സ്പെഷ്യല് ഓപ്പറേഷന് ഗ്രൂപ്പ് ഡെപ്യൂട്ടി കമാന്റന്റിന്റെ അധികചുമതലയും വഹിക്കുന്നു. സബ്ബ് ഇന്സ്പെക്ടറായ സാജന്.കെ.ജോര്ജ് നിലവില് എറണാകുളം റൂറല് ജില്ലാ സ്പെഷ്യല് ബ്രാഞ്ചില് ജോലി ചെയ്യുന്നു.
അസിസ്റ്റന്റ് സബ്ബ് ഇന്സ്പെക്ടറായ ശശികുമാര്.എല് തിരുവനന്തപുരം വിജിലന്സ് ആന്റ് ആന്റി കറപ്ഷന് ബ്യൂറോയില് ജോലി ചെയ്യുന്നു. നിലവില് പുതുക്കാട് പോലീസ് സ്റ്റേഷനിലെ അസിസ്റ്റന്റ് സബ്ബ് ഇന്സ്പെക്ടറാണ് ഷീബ.എ.കെ.