ന്യൂഡൽഹി: യൂട്യൂബ് ചാനലിലൂടെ മാസം നാല് ലക്ഷം രൂപ വരുമാനം ലഭിക്കുന്നുണ്ടെന്ന് കേന്ദ്രമന്ത്രി നിതിൻ ഗഡ്കരി. കോവിഡ് കാലത്ത് യൂട്യൂബിൽ പോസ്റ്റ് ചെയ്ത പ്രഭാഷണങ്ങളിൽ നിന്നാണ് വരുമാനമെന്നും മന്ത്രി പറഞ്ഞു. ഡൽഹി-മുംബൈ എക്സ്പ്രസ് വേയുടെ പുരോഗതി വിലയിരുത്തുന്നതിനായി ഹരിയാനയിൽ എത്തിയതായിരുന്നു മന്ത്രി.
കോവിഡ് കാലത്ത് താൻ രണ്ട് കാര്യങ്ങളിലാണ് ശ്രദ്ധനൽകിയതെന്ന് അദ്ദേഹം പറഞ്ഞു. താനൊരു പാചകക്കാരനായി മാറി. വീട്ടിൽ പാചകം ചെയ്യാനും ആരംഭിച്ചു. മറ്റൊന്ന് വീഡിയോ കോൺഫറൻസ് വഴി ഓൺലൈൻ ലക്ചറുകൾ എടുക്കാനും ആരംഭിച്ചു.
വിദേശ സർവകലാശകളിലെ കുട്ടികൾക്ക് അടക്കം എടുത്ത 950 ൽ അധികം ലക്ചറുകൾ പോസ്റ്റ് ചെയ്തിട്ടുണ്ട്. ഇതികം കാഴ്ചക്കാരുടെ എണ്ണം വർധിച്ചു. യൂട്യൂബ് മാസം നാല് ലക്ഷത്തിലധികം രൂപ നൽകുന്നുണ്ടെന്നും മന്ത്രി പറഞ്ഞു. യൂ ട്യൂബിൽ മന്ത്രിക്ക് 1.99 ലക്ഷം സബ്സ്ക്രൈബേഴ്സ് ആണുള്ളത്.