തൃശ്ശൂർ: യുവാവിനെ വെട്ടിപ്പരിക്കേൽപ്പിച്ച സംഭവത്തിൽ സിനിമാ താരം വിനീത് തട്ടിൽ ഡേവിഡ് അറസ്റ്റിൽ. തുറവൂർ സ്വദേശിയായ അലക്സിനെ വെട്ടിപ്പരിക്കേൽപ്പിച്ച സംഭവത്തിലാണ് വിനീതിനെ പോലീസ് അറസ്റ്റ് ചെയ്തത്. സാമ്പത്തിക തർക്കമാണ് ആക്രമണത്തിലേക്ക് നയിച്ചത് എന്നാണ് പോലീസിൽ നിന്നും ലഭിക്കുന്ന വിവരം.
കഴിഞ്ഞ ദിവസം വൈകീട്ടോടെയായിരുന്നു വിനീത് അലക്സിനെ വെട്ടിപ്പരിക്കേൽപ്പിച്ചത്. ഇരുവരും തമ്മിൽ ഏറെ നാളായി സാമ്പത്തിക തർക്കം ഉണ്ടായിരുന്നു. ഇതിനിടെ കഴിഞ്ഞ ദിവസം വിനീത് അലക്സിന്റെ വീട്ടിലെത്തി. ഇവിടെവെച്ച് ഇരുവരുമായി തർക്കമുണ്ടായി. ഇതിനു പിന്നാലെ കയ്യിൽ കരുതിയിരുന്ന വടിവാൾ ഉപയോഗിച്ച് വിനീത് അലക്സിനെ വെട്ടിപ്പരിക്കേൽപ്പിക്കുകയായിരുന്നു.
ആക്രമണത്തിൽ അലക്സിന്റെ കൈക്കാണ് പരിക്കേറ്റിട്ടുള്ളത്. ഇയാൾ ചികിത്സയിലാണ്. അലക്സിന്റെ പരാതിയിൽ രാത്രിയോടെയാണ് വിനീതിന്റെ അറസ്റ്റ് പോലീസ് രേഖപ്പെടുത്തിയത്.