ആലുവ:മോഫിയ ആത്മഹത്യ കേസിൽ സമരം ചെയ്ത കോൺഗ്രസ് പ്രവർത്തകർക്കെതിരെ തീവ്രവാദ ആരോപണം സംഭവത്തിൽ രണ്ട് എസ്ഐമാരെ സസ്പെൻഡ് ചെയ്തു. ആലുവ സ്റ്റേഷനിലെ എസ്.ഐമാരായ ആർ.വിനോദ്, രാജേഷ് എന്നിവരെയാണ് സസ്പെൻഡ് ചെയ്തത്. മോഫിയ കേസിൽ സമരം ചെയ്ത കോൺഗ്രസ് പ്രവർത്തകരുടെ കസ്റ്റഡി റിപ്പോർട്ടിലാണ് തീവ്രവാദ പരാമർശം ഉണ്ടായിരിക്കുന്നത്. വിഷയത്തിൽ മുനമ്പം ഡിവൈഎസ്.പിയോട് അന്വേഷണം നടത്തി റിപ്പോർട്ട് സമർപ്പിക്കാൻ തിരുവനന്തപുരം ഡിഐജി ആവശ്യപ്പെട്ടിട്ടുണ്ട്.
നേരത്തെ വിഷയത്തിൽ കേരളാ പൊലീസിന് മുന്നറിയിപ്പുമായി കെപിസിസി അധ്യക്ഷൻ കെ. സുധാകരൻ രംഗത്തുവന്നിരുന്നു. “മുസ്ലിം പേരുണ്ടായാൽ തീവ്രവാദിയാക്കുന്ന നിൻ്റെയൊക്കെ മതവെറി, ഞങ്ങൾ കോൺഗ്രസ്സുകാരോട് വേണ്ട. ഇത് കേരളമാണ്, ഗുജറാത്തല്ല. നിങ്ങൾക്ക് ശമ്പളം തരുന്നത് ആർഎസ്എസിന്റെ നാഗ്പൂർ കാര്യാലയത്തിൽ നിന്നുമല്ല. നിങ്ങൾ തിരുത്തും. ഞങ്ങൾ നിങ്ങളെ തിരുത്തിച്ചിരിക്കും.” കെ സുധാകരൻ ട്വീറ്റ് ചെയ്തു.
