ഡൽഹി: ജെഎൻയു വിദ്യാർഥി സമരത്തിന് ബിജെപിയിൽനിന്നും പിന്തുണ. ജഐൻയു വൈസ് ചാൻസലർ എം.ജഗദേഷ് കുമാറിനെ പുറത്താക്കണമെന്ന് ബിജെപിയുടെ മുതിർന്ന നേതാവ് മുരളി മനോഹർ ജോഷി ആവശ്യപ്പെട്ടു. ട്വിറ്ററിലൂടെയായിരുന്നു അദ്ദേഹത്തിന്‍റെ പ്രതികരണം. വിദ്യാർഥികൾ ഉന്നയിക്കുന്ന ഫീസ് പ്രശ്നം പരിഹരിക്കണമെന്ന് സർക്കാർ ആവശ്യപ്പെട്ടിട്ടും വിസി നടപടി എടുത്തില്ല. സർക്കാർ നിർദേശം അവഗണിക്കുന്ന വിസിയെ പദവിയിൽനിന്നും നീക്കം ചെയ്യണമെന്നാണ് ജോഷി ആവശ്യപ്പെട്ടിരിക്കുന്നത്.
ഫീസ് പ്രശ്നം പരിഹരിക്കുന്നതിന് വിവേകപൂര്‍വമായ സൂത്രവാക്യങ്ങൾ നടപ്പിലാക്കാൻ എച്ച്ആർഡി മന്ത്രാലയം ജെഎൻയു വിസിക്ക് രണ്ടുതവണ നിർദ്ദേശം നൽകിയതായാണ് റിപ്പോർട്ടുകൾ. വിദ്യാർഥികളെയും അധ്യാപകരെയും കാണാനും അദ്ദേഹത്തിന് നിർദേശം നൽകിയതാണ്. സർക്കാർ നിർദേശം നടപ്പാക്കാൻ വഴങ്ങാതെ വിസി ഉറച്ചുനിൽക്കുന്നത് ഞെട്ടിപ്പിക്കുന്നതാണ്. ഈ മനോഭാവം ദൗർഭാഗ്യകരമാണ്. തന്‍റെ അഭിപ്രായത്തിൽ, ഇത്തരമൊരു വിസിയെ ഈ പദവിയിൽ തുടരാൻ അനുവദിക്കരുത്- ജോഷി ട്വീറ്റ് ചെയ്തു.
