കണ്ണൂർ: പരിയാരത്തെ കണ്ണൂർ ഗവ. മെഡിക്കൽ കോളജിൽനിന്നു കോവിഡ് 19 രോഗമുക്തി നേടിയ വയോധികൻ മരിച്ചു. പാപ്പിനിശേരി വെസ്റ്റ് ഇല്ലിപ്പുറം സ്വദേശി രാമാലയത്തിൽ പോരയിൽ കുഞ്ഞിരാമൻ നമ്പ്യാർ (81) ആണ് മരിച്ചത്. വെള്ളിയാഴ്ച രാത്രി 8.45 ന് പരിയാരം മെഡിക്കൽ കോളജ് ആസ്പത്രിയിലായിരുന്നു മരണം.
മകളുടെ കൂടെ ഡൽഹിയിലായിരുന്ന കുഞ്ഞിരാമൻ നമ്പ്യാർ ഈ മാസം 14 നാണ് കണ്ണൂരിൽ എത്തിയത്. എത്തിയപ്പോൾത്തന്നെ രോഗാവസ്ഥയിലായിരുന്നതിനാൽ പരിയാരത്ത് ചികിൽസയിലായിരുന്നു. അതിനിടയിലാണ് സ്രവ പരിശോധനയിൽ കോവിഡ് പോസിറ്റീവ് സ്ഥിരീകരിച്ചത്.
പിന്നീട് 19, 20 തീയതികളിൽ നടന്ന പരിശോധനാഫലം നെഗറ്റീവായിരുന്നു. എന്നാൽ വൃക്കരോഗമുൾപ്പെടെയുള്ളതിനാൽ ആശുപത്രിയിലെ തീവ്രപരിശോധനാ വാർഡിൽ കഴിയുകയായിരുന്നു.
