തിരുവനന്തപുരം: ദേശീയ അന്വേഷണ ഏജൻസിയുടെ ചോദ്യം ചെയ്യലിന് ഹാജരാകേണ്ടി വന്ന മന്ത്രി കെ.ടി. ജലീലിന് ഇനിയും മന്ത്രിസ്ഥാനത്ത് തുടരാൻ അർഹതയില്ലെന്ന് ബിജെപി. മന്ത്രിയുടെ രാജി അനിവാര്യമാണെന്നും ഇനിയെങ്കിലും മന്ത്രി രാജി വെക്കണമെന്നും ബിജെപി സംസ്ഥാന അധ്യക്ഷൻ കെ.സുരേന്ദ്രൻ ആവശ്യപ്പെട്ടു.
ഖുറാന്റെ മറവിൽ മന്ത്രി സ്വർണക്കടത്തിന് കൂട്ടു നിന്നു എന്ന് ആദ്യം ആരോപണം ഉന്നയിച്ചത് ബിജെപിയാണെന്നും ആ ആരോപണം വാസ്തവമാണെന്ന് തെളിഞ്ഞുവെന്നും സുരേന്ദ്രൻ പറഞ്ഞു. മന്ത്രിയെ ഇത്രയേറെ സംരക്ഷിച്ച മുഖ്യമന്ത്രിയും ധാർമികതയുണ്ടെങ്കിൽ രാജിവച്ച് പുറത്ത് പോകണമെന്നും സുരേന്ദ്രൻ ആവശ്യപ്പെട്ടു.
ഇനിയും മന്ത്രിയെ ന്യായീകരിക്കാൻ സിപിഎമ്മിനും മുഖ്യമന്ത്രിക്കും സാധിക്കില്ലെന്നും മന്ത്രി രാജി വയ്ക്കും വരെ ബിജെപി ശക്തമായ പ്രതിഷേധ പരിപാടികൾ സംഘടിപ്പിക്കുമെന്നും സുരേന്ദ്രൻ പറഞ്ഞു.