കൊച്ചി: മു നമ്പത്ത് ബോട്ട് യാർഡിൽ ഉണ്ടായ തീപിടിത്തത്തിൽ അറ്റകുറ്റപ്പണികൾക്കായി കയറ്റിയിരുന്ന മത്സ്യബന്ധന ബോട്ട് കത്തിനശിച്ചു. തിങ്കൾ രാത്രി 10.45ന് മിനി ഫിഷിംഗ് ഹാർബറിനടുത്തുള്ള മുനമ്പം സ്വദേശി അജിബ്രോസ് എന്നയാളുടെ യാർഡിലാണ് തീപിടിത്തമുണ്ടായത്.
ഇവിടെ പണിക്ക് കയറ്റിയിരുന്ന “ഹോളി ഗ്രേസ്’ എന്ന മത്സ്യബന്ധന ബോട്ടാണ് അഗ്നിക്കിരയായത്. ആളപായമില്ല. തീപിടിത്തതിനു കാരണം എന്തെന്നും വ്യക്തമല്ല. രാത്രി പത്തുവരെ യാർഡിൽ പണിക്കാരുണ്ടായിരുന്നു. ഇവർ പോയി കുറച്ച് സമയം കഴിഞ്ഞപ്പോഴാണ് തീപിടിത്തമുണ്ടായത്.
അയൽവാസികളിലൊരാൾ തീ ഉയരുന്നതുകണ്ട് യാർഡ് ഉടമസ്ഥനെ അറിയിക്കുകയായിരുന്നു. സംഭവമറിഞ്ഞ് സ്ഥലത്തെത്തിയ മുനന്പം പോലീസും പറവൂരിൽനിന്ന് എത്തിയ രണ്ട് ഫയർ യൂണിറ്റുകളുമാണ് തീയണച്ചത്. 80 അടി ബോട്ടിന്റെ വീൽഹൗസ് പൂർണമായും കത്തിനശിച്ചു. ബോട്ടിനു മാത്രം 30 ലക്ഷം രൂപ നഷ്ടം സംഭവിച്ചതായി ഉടമകൾ അറിയിച്ചു.
