ഉപ്പുതറ : അയ്യപ്പന്‍കോവില്‍ പഞ്ചായത്തില്‍ തക്കാളി പനി പടരുന്നു. കിഴക്കേമാട്ടുക്കട്ട, ചപ്പാത്ത്, മാട്ടുക്കട്ട പ്രദേശങ്ങളിലെ കുട്ടികളിലാണ് തക്കാളി പനി പടരുന്നത്.. . മാട്ടുക്കട്ട സര്‍ക്കാര്‍ എല്‍ പി സ്‌കൂളില്‍ ‘പഠിക്കുന്ന കിഴക്കേമാട്ടുക്കട്ട സ്വദേശിയായ കുട്ടിയിലാണ് ആദ്യം തക്കാളിപ്പനിയുടെ ലക്ഷണം കണ്ടത്. പിന്നീട് ഇതേസ്‌കൂളിലെ പല കുട്ടികളിലേക്കും രോഗം പടര്‍ന്നു .രോഗം ബാധിച്ച കുട്ടികളില്‍ പലര്‍ക്കും കടുത്ത പനിയും , ചുമയും, ഛര്‍ദ്ദിയും, വയറിളക്കവും ഉണ്ട്. ശരീരത്ത് മുഴുവന്‍ ചുവന്നു തുടുത്ത വലിയ കുരുക്കളും ഉണ്ട് . അസഹനീയമായ ചൊറിച്ചിലും അനുഭവപ്പെടുന്നുണ്ട്. നിലവില്‍ രോഗത്തിന്റെ ഉറവിടം കണ്ടെത്താന്‍ കഴിഞ്ഞിട്ടില്ല. കാഞ്ചിയാര്‍ പ്രാഥമീകാരോഗ്യ കേന്ദ്രത്തിലെ ചികിത്സയിലാണിവര്‍. ആന്റീ ബയോട്ടിക് മരുന്നുകളും, വിശ്രമവുമാണ് പ്രതിവിധി. തക്കാളിപ്പനിക്ക് പുറമെ വൈറല്‍ പനിയും പ്രദേശത്ത് പടരുന്നുണ്ട്. പനിയുടെ ലക്ഷണം കണ്ടാലുടന്‍ ചികിത്സ തേടണമെന്ന് ഡോക്ടര്‍മാര്‍ നിര്‍ദ്ദേശിച്ചു.
