മോഹിത് സൂരി സംവിധാനം ചെയ്യുന്ന റൊമാന്‍റിക് ആക്‌ഷൻ ചിത്രം മലംഗിന്‍റെ പോസ്റ്റർ കഴിഞ്ഞ ദിവസം പുറത്തിറങ്ങിയിരുന്നു. പോസ്റ്റർ പുറത്തുവന്നതിന് പിന്നാലെ വിമര്‍ശനവുമായി നിരവധിപേര്‍ എത്തിയിരിക്കുകയുമാണ്. വന്യമായ രണ്ട് ആത്മാക്കളും ഒരു പ്രണയവും എന്നുപറഞ്ഞാണ് ദിഷ ഈ പോസ്റ്റർ പങ്കുവെച്ചിരിക്കുന്നത്.
നായിക ദിഷ പഠാനിയെ ചുംബിക്കുന്ന ആദിത്യയാണ് പോസ്റ്ററിലുള്ളത്. ആദിത്യയുടെ ചുമലിൽ ഇരുന്നുകൊണ്ടാണ് ദിഷയുടെ ലിപ് ലോക്ക്.
ഇത്തരം പോസ്റ്ററുകൾ യുവജനങ്ങളെ മോശമായി സ്വാധീനിക്കുമെന്നും ചിത്രം ഉറപ്പായും ബോക്സോഫീസിൽ പരാജയമാകുമെന്നുമൊക്കെയാണ് വിമർശകർ പോസ്റ്ററിന് താഴെ കമന്‍റുകളുമായി എത്തിയിരിക്കുന്നത്.
അനില്‍ കപൂര്‍, ആദിത്യ റോയ് കപൂര്‍, ദിഷ പഠാനി, കുനാല്‍ ഖേമു തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. അങ്കിത് തിവാരി, അനുപം റോയ്, മിത്തൂണ്‍, ജീത് ഗാംഗുലി എന്നിവര്‍ ചേര്‍ന്ന് സംഗീതമൊരുക്കിയിരിക്കുന്ന ചിത്രം ലവ് രഞ്ജന്‍, അങ്കുര്‍ ഗാര്‍ഗ്, ഭൂഷണ്‍ കുമാര്‍, കൃഷന്‍ കുമാര്‍, ജയ് ഷെവക്രാമന്‍ എന്നിവര്‍ ചേര്‍ന്നാണ് നിര്‍മ്മിക്കുന്നത്. ചിത്രം വാലന്‍റൈൻസ് ഡേയ്ക്ക് മുന്നോടിയായി ഫെബ്രുവരി ഏഴിനാണ് തീയേറ്ററുകളിലെത്താനായി ഒരുങ്ങുന്നത്.
